Endlich, jetzt ischs so wiit, dä welki Maa tritt zruck,
dä Zitteri, dä Tattergreis, dä Alt mit Hut und Stock.
S dunkt mi lang gnuag het er regiart,
verwirrti Parola umaplagiert.

Wer jetzt maint i hegs vum Mäse, dä hät sich zünftig gschnitta,
also nai, wia kama nur, i muass doch würklich bitta!
Logisch, as sich dr Benedikt, wo n'i do tuan beschrieba,
denn dr Mäse und dr Benedikt, dia sind doch recht verschieda.

Immerhin, ihra Rücktritt isch synchron,
doch ich meins, ganz ohne Hohn,
dass dä vum Mäse dütlich schwerer wiegt,
was miar dr Alass für dia Vers do git.

Dr Mäse kunnt, das sich bekannt,
ursprünglich us am Unterland,
und obwohl er us am Nebel isch kho,
het d'OLG na gern unter d Fittich gno.
Er hets mit Engagement verdankt,
drum bald scho für da Vorstand zankt,
und will er so gar kein Schücha isch,
sitzt er recht rasch als Präsi am Tisch.

Mini erscht Erinnerig an Mäse isch schlicht phänomenal,
si sich passiert im Lagerhaus, imna Juratal,
döt het er mit Überzügig, das sich nia verkehrt,
min randalierenda Bruader in Kellerschacht iigspeert.

Aso an Präsident, dä hetz nid aifach, klar,
Sitziga und Diskussion, das wär jo wunderbar,
doch all dia Mail, wo ma muass versenda,
all das Zügs, wo ma muass dra denka…
A Generalversammlung als Krönig vum Johr,
kei Wunder wachsend ihm graui Hohr.

Dia hochi Position isch ohni starki Frau a Qual,
Michelle Obama, Carla Bruni, Ursi Ruppenthal.
Nochwuchsförderig, dia sich wichtig, au im Bündnerland,
drum nehmend dia zwei das Problem grad in dia eigni Hand.

Im Gegensatz zum Obama und Monsieur Sarkozy
sich dr Mäse an Präsident ohne Bodygards gsi.
Fascht wird's ihm zum Verhängnis, döt am Arge Alp,
zum Glück bliebt vu dem Attentat nur Narbagweb am Skalp.

Höhepunkt in Mäse's Ära, vu dena gits gar viele,
d Swiss-O-Week bringt Reichtum, s Jubiläum Brot und Spiele.
Und isch irgendwo Not am Maa, für da Mäse ischs kein Graus,
denn macht er halt no es Kartatraining oder spielt dr Samichlaus.

Herzlich Dank für dia viela Stund,
so tuan i jetzt halt schwermütig kund:
Dr Mäse, er tritt zruck, es ist aus,
verdient het er drum tosenda Applaus.

Simon Egli